తెలంగాణకు ప్ర‌క‌టించిన హైస్పీడ్ రైళ్ల ప‌నులు వేగ‌వంతం చేయాలని ముఖ్యమంత్రి శ్రీ ఎ. రేవంత్ రెడ్డి గారు కేంద్ర రైల్వే శాఖ మంత్రి శ్రీ అశ్వినీ వైష్ణవ్ గారికి విజ్ఞప్తి చేశారు. హైదరాబాద్ – పుణె, హైదరాబాద్ – బెంగళూరు, హైదరాబాద్ – చెన్నై కారిడార్లకు సంబంధించి, కేంద్ర ప్రభుత్వం పంపిన ప్ర‌తిపాద‌న‌ల‌పై రాష్ట్ర ప్రభుత్వం స‌మీక్షించి, కొన్ని మార్పుల‌ను సూచిస్తూ కేంద్ర ప్ర‌భుత్వానికి ప్ర‌తిపాద‌న‌లు పంపింద‌ని తెలిపారు.
ఈ మూడు కారిడార్లకు సంబంధించి రాష్ట్ర ప్రభుత్వం ఎటువంటి భూ సేక‌ర‌ణ ప్ర‌క్రియ‌ను ప్రారంభించ‌లేద‌ని కేంద్ర మంత్రికి వివరించారు. కేంద్ర ప్రభుత్వం అలైన్‌మెంట్ ఆమోదించిన త‌ర్వాత భూ సేక‌ర‌ణ‌ను ప్రారంభిస్తామ‌ని స్ప‌ష్టం చేశారు. సాధ్య‌మైనంత త్వరగా అలైన్‌మెంట్ ప్ర‌క్రియ‌ను పూర్తి చేయాలని విజ్ఞప్తి చేశారు.
ముఖ్యమంత్రి గారు ఢిల్లీ రైలు భ‌వ‌న్‌లో రైల్వే శాఖ మంత్రి అశ్వినీ వైష్ణవ్ గారితో భేటీ అయ్యారు. ఈ సంద‌ర్భంగా తెలంగాణ అభివృద్ధికి అవ‌స‌ర‌మైన కీల‌క రైలు ప్రాజెక్టుల‌పై చ‌ర్చించారు. వికారాబాద్ – కృష్ణా కొత్త రైలు మార్గాన్ని (130 కి.మీ) వెంట‌నే మంజూరు చేయాలని కోరారు.
వికారాబాద్ జిల్లా టేకల్‌కోడ్ పరిసరాల్లో భారీ సున్నపురాయి నిక్షేపాలు బయటపడ్డాయని, దీంతో ఈ ప్రాంతాన్ని సిమెంట్, టెక్స్‌టైల్ హబ్‌గా మార్చేందుకు ప్రభుత్వం ప్రణాళికలు సిద్ధం చేసిందని కేంద్ర మంత్రికి వివరించారు.
హైదరాబాద్ చుట్టూ సుమారు 360 కి.మీ మేర నిర్మిస్తున్న రీజినల్ రింగ్ రోడ్డు (RRR) ప‌క్క‌నే రీజినల్ రింగ్ రైలుకు కూడా అలైన్‌మెంట్ చేయాలని ముఖ్యమంత్రి గారు కోరారు. రీజినల్ రింగు రైలుతో పెద్ద ఎత్తున ఉపాధి అవకాశాలు లభిస్తాయన్నారు.
డోర్నకల్- గద్వాల్‌, కల్వకుర్తి – మాచర్ల, కాచిగూడ –జగ్గయ్యపేట (250 కి.మీ.), పటాన్‌చెరు – ఆదిలాబాద్ (320 కి.మీ.), బోధన్ – లాతూర్ (175 కి.మీ.), అక్కన్నపేట బైపాస్ లైన్ (8 కి.మీ.) మార్గాల‌ను వెంట‌నే మంజూరు చేయాలని మరోసారి విజ్ఞప్తి చేశారు.
దక్షిణ మధ్య రైల్వే ప్రతిష్టాత్మకంగా చేపట్టదలచిన మెగా కోచింగ్, ఫ్రైట్ మెయింటెనెన్స్ డిపోను మహబూబాబాద్ స‌మీప అనంతారం గ్రామంలో ఏర్పాటు చేయాలని అశ్వినీ వైష్ణవ్ గారిని కోరారు. ఈ డిపో ఏర్పాటుకు అవ‌స‌ర‌మైన 409.1 ఎకరాల భూమిని రైల్వే శాఖ‌కు అప్పగించేందుకు ఇప్ప‌టికే అంగీక‌రించిన విష‌యాన్ని గుర్తుచేస్తూ, మెగా ఫ్రైట్ మెయింటెనెన్స్ డిపోకు త్వరగా అనుమతులు మంజూరు చేయాలని కోరారు.
ఈ స‌మావేశంలో మంత్రి వివేక్ వెంకటస్వామి గారు, ఎంపీలు అనిల్ కుమార్ యాదవ్ గారు, వేం నరేందర్ రెడ్డి గారు, డాక్ట‌ర్ మ‌ల్లు ర‌వి గారు, బలరాం నాయక్ గారు, చామ‌ల కిర‌ణ్ కుమార్ రెడ్డి గారు, గడ్డం వంశీకృష్ణ గారు, ఢిల్లీలో రాష్ట్ర ప్ర‌భుత్వ ప్ర‌త్యేక ప్రతినిధి ఏపీ జితేంద‌ర్ రెడ్డి గారితో పాటు ఉన్నతాధికారులు పాల్గొన్నారు.
New Delhi: Expediting three proposed high-speed rail corridors connecting Hyderabad with Pune, Bengaluru and Chennai, along with several key railway projects for Telangana, featured prominently in discussions between Hon’ble Chief Minister Sri A. Revanth Reddy and Hon’ble Union Railway Minister Sri Ashwini Vaishnaw in New Delhi.
The Chief Minister sought swift clearance of the alignments for the three corridors, with the State Government having reviewed the Centre’s proposals, suggested modifications and submitted its recommendations. Land acquisition will begin once the Centre approves the alignments.
Immediate sanction was sought for the 130-km Vikarabad–Krishna railway line. The Chief Minister highlighted the substantial limestone deposits near Tekalkode in Vikarabad district and the State Government’s plans to develop the region into a cement and textile hub.
A Regional Ring Rail alongside the 360-km Regional Ring Road (RRR) around Hyderabad was also proposed, with the potential to generate large-scale employment. The demand for sanction of the Dornakal–Gadwal, Kalwakurthy–Macherla, Kacheguda–Jaggayyapet (250 km), Patancheru–Adilabad (320 km), Bodhan–Latur (175 km) railway lines and the 8-km Akkannapet Bypass Line was reiterated.
The Chief Minister also sought clearance for the Mega Coaching and Freight Maintenance Depot at Anantharam village near Mahabubabad. The State Government has already agreed to hand over 409.1 acres to the Railways for the project.
Minister Vivek venkataswamy, MPs Anil Kumar Yadav, Vem Narender Reddy, Dr. Mallu Ravi, Balaram Naik, Chamala Kiran Kumar Reddy and Gaddam Vamsi Krishna, Telangana Government’s Special Representative in Delhi A.P. Jithender Reddy and senior officials attended the meeting.
